Zergak aldikariak 30 urte bete ditu, eta etapa berri bati hasiera emateko erabili dute urteurrena. Diseinu berri bat erabili dute, modernoagoa, irudia ezagutzeko errazagoa eta eskuragarriagoa dena, informaziora errazago iristeko. Gainera, artikulu eta kolaborazioen estandar laburrago baten alde egin dute, baina interesa eta gaurkotasuna galdu gabe.
Zergak aldizkaria 1993tik argitaratzen du Euskadiko Zerga Koordinaziorako Organoak (EZKO), eta fiskalitatearekin lotutako gaiak jorratzen ditu nagusiki, Euskadiko fiskalitatera bereziki bideratuta.
30 urte hauetan, Zergak aldizkariak aukera eman die hainbat egileri eta kolaboratzaileri —dela esparru publikokoak, dela publikokoak, arlo akademikokoak edo administrazioaren alorrekoak— zerga-arloarekin eta, bereziki, Ekonomia Itunarekin eta zerga-sistema foralekin zerikusia duten haien lanak eta gogoetak hedatzeko. Horrez gain, aldizkariak balio izan du Itunaren esparruan eratutako EAEko zerga-sistemaren berri emateko eta horretan sakontzeko bide gisa, dio Itziar Agirre Berriotxoa Eusko Jaurlaritzako Ogasuneko sailburuordeak.
Sortu zenean, 1993an, helburua zuen zerga-arloko informazio eta prestakuntzarako tresna publikoa izatea, bereziki Euskadiko lurralde-eremura mugatuta. Testuinguru hartan, ulertu zen bazegoela espazio bat antzeko orientazioa zuten aldizkako beste argitalpen batzuek estaltzen ez zutena, eta EZKOn ordezkatutako erakundeek pentsatu zuten interesgarria zela hura betetzea. Formari dagokionez, aldaketa batzuk izan ditu bere ibilbidean zehar —esanguratsuena, 2011ko bilakaera, paperezko formatutik formatu digitalera pasatzea—, baina beraren xedea, egitura eta lehentasunezko edukiak ez dira asko aldatu urte hauetan zehar.
Ildo editorialak lehentasuna eman die Ekonomia Ituna eta gure zerga-sistemen berezitasunak erreferente dituzten informazioei, artikuluei, azterlanei edo hausnarketei. Gainera, foru-erakundeen zerga-jarduera hedatzeko plataforma izan da, eta arreta berezia eskaini die Europar Batasunaren zerga-politikari eta EBren barruko zerga-harmonizazioari buruzko lanei eta erreferentziei, betiere lehentasuna emanez zerga-egoerarekin eta zerga-arloko etorkizuneko itxaropenekin bat datozen gaiak tratatzeari.
Aldizkari elektroniko edo newsletter moduko hedabide baten alde egiten dute, erakargarriagoa eta efikazagoa izango baita, eta ingurune digitalaren erabileran gero eta gaitasun handiagoa duen publiko bati egokitua. Diseinu berriarekin irismena zabaltzea espero dute, batez ere horrelako komunikazio-tresnek pertsona bakoitzarentzat interesgarriak izan daitezkeen eduki zehatzak hautatzeko ematen duten gaitasunagatik. Aldizkariaren harpidetzea ere erraztasun osoz egin daiteke.
Iturria: Zergak Aldizkaria